બાળકોને યોગ્ય ઉછેર આપવાની સફર સરળ નથી. આ સમયગાળા દરમિયાન, માતાપિતાએ ઘણા પડકારોનો સામનો કરવો પડે છે. મોટાભાગના બાળકો એવી વસ્તુઓ કરવાનો પ્રયાસ કરે છે જે તેમને ન કરવાની સૂચના આપવામાં આવે છે અને જ્યારે પકડાય છે, ત્યારે તેઓ પોતાની ભૂલ છુપાવવા માટે ખોટું બોલવાનું શરૂ કરે છે. પરંતુ જ્યારે દરેક નાની વાતમાં ખોટું બોલવું બાળકની આદત બની જાય છે, ત્યારે તે ચિંતાનો વિષય બની જાય છે. જો આ આદતને સમયસર સુધારવામાં ન આવે, તો બાળક મોટું થાય ત્યારે આ આદત માતાપિતા માટે ગંભીર સમસ્યા બની શકે છે.

બાળકોના વર્તન અને આદતો પર બાળપણથી જ નજર રાખવી ખૂબ જ મહત્વપૂર્ણ છે, નહીં તો બાળપણની આ આદતો કિશોરાવસ્થામાં પહોંચે ત્યાં સુધીમાં મોટું સ્વરૂપ લઈ શકે છે. પરંતુ, પહેલા એ સમજવું મહત્વપૂર્ણ છે કે બાળકોમાં જૂઠું બોલવાની આદત કેવી રીતે વિકસે છે.

બાળક કેમ જુઠું બોલે છે તે જાણો

બાળકની પહેલી શાળા તેનું ઘર છે અને તેના પહેલા શિક્ષકો તેના માતાપિતા છે. જેમ જેમ તે તેમને તે કરતા જુએ છે, તેમ તેમ તે પણ એ જ ટેવો અપનાવે છે. ભલે માતા-પિતા તેમના બાળકોને સારો ઉછેર આપવા માટે શ્રેષ્ઠ પ્રયાસો કરે છે, તેઓ ભૂલી જાય છે કે તેમની નાની આદતો પણ, જાણતા કે અજાણતા, તેમના બાળકો પર મોટા પાયે અસર કરે છે. જો બાળકે તમને કોઈ બાબતમાં ખોટું બોલતા જોયા હોય, તો શક્ય છે કે તેને પણ એવું જ કરવાની આદત પડી જાય. આ ઉપરાંત, જ્યારે બાળકો તેમના પરિવાર કે માતાપિતા વચ્ચે સુરક્ષિત અનુભવતા નથી, ત્યારે તેઓ નવી વાર્તાઓ બનાવવાનું શરૂ કરે છે. 

બીજાઓનું ધ્યાન આર્કષિત કરવા

બાળકો કયારેક બીજાઓનું ધ્યાન આકર્ષિત કરવા માટે કાલ્પનિક વાર્તાઓ બનાવવાનું શરૂ કરે છે. કિશોરાવસ્થામાં, સામાજિક દબાણને કારણે અને સારી છબી બતાવવા માટે, બાળકો પોતાના વિશે અતિશયોક્તિ કરવાનું શરૂ કરે છે. કલ્પના અને વાસ્તવિકતા વચ્ચેનો તફાવત સમજી ન શકવાને કારણે, નાના બાળકો ઘણીવાર ખોટી હકીકતો રજૂ કરવાનું શરૂ કરે છે. જો પરિવારનું વાતાવરણ સારું ન હોય તો બાળકો તણાવમાં આવી જાય છે. જ્યારે આવું થાય છે, ત્યારે તેઓ પોતાની વર્ચ્યુઅલ દુનિયા બનાવે છે અને તેને સાચું માનવા લાગે છે. 

માતાપિતા બાળક સાથે વાતચીત કરી લાવે ઉકેલ

બાળકોનું મન ખૂબ જ ચંચળ હોય છે, તેથી જરૂરી નથી કે તેઓ એક જ વારમાં કંઈક સમજી જાય. એટલે આરંભથી બાળકો સાથે ખુલ્લા અને આરામદાયક વાતચીત સ્થાપિત કરો જેથી તેઓ તેમની બધી સમસ્યાઓ અને મુદ્દાઓ કોઈપણ ડર વિના તમારી સાથે શેર કરી શકે. ઉદાહરણ તરીકે, જ્યારે તમારું બાળક શાળાએથી પરત આવે ત્યારે તેનું સ્મિત સાથે સ્વાગત કરો અને તેના દિવસ વિશે જાણવામાં રસ લો. આનાથી બાળકને ખ્યાલ આવશે કે તમને તેના જીવનમાં કેટલો રસ છે. તમે તેને જે સારી ટેવો શીખવવા માંગો છો, તેને સૂચનાઓના રૂપમાં સમજાવવાને બદલે, આસપાસના ઉદાહરણો આપીને વાતચીત દ્વારા સમજાવો.