યુટ્યુબર રણવીર અલ્લાહાબાદિયા, સોશિયલ મીડિયા ઈન્ફ્લુએન્સર અપૂર્વ મખીજા, કોમેડિયન સમય રૈના અને શો 'ઇન્ડિયાઝ ગોટ લેટેન્ટ'ના આયોજકો સામે ફરિયાદ દાખલ કરવામાં આવી છે. મુંબઈના ખાર પોલીસ સ્ટેશનમાં આ યુટ્યુબર્સ વિરુદ્ધ ફરિયાદ દાખલ કરવામાં આવી છે. યુટ્યુબ પર સ્ટ્રીમ થતા ‘ઇન્ડિયા હેઝ ગોટ લેટેન્ટ’ નામના શોમાં પીરસાયેલી અત્યંત હલકી કક્ષાની કમેન્ટ્સ અંગે ફરિયાદ થઇ છે અને આ અંગે મહારાષ્ટ્રના મુખ્યમંત્રીએ પણ પોતાનો વિરોધ નોંધાવ્યો છે. પોલીસને મળેલી ફરિયાદમાં આરોપીઓ સામે કડક કાર્યવાહીની માગ કરવામાં આવી છે. શું છે આખો મામલો? ‘બિયર બાઇસેપ્સ’ તરીકે જાણીતા સોશિયલ મીડિયા ઇન્ફ્લુએન્સર અને પોડકાસ્ટર રણવીર અલ્લાહાબાદિયા તાજેતરમાં

સ્ટેન્ડ-અપ કોમેડિયન સમય રૈનાના શો 'ઇન્ડિયાઝ ગોટ લેટેન્ટ'માં દેખાયા હતા. આ શો તેના વિવાદાસ્પદ અને બોલ્ડ કોમેડી કન્ટેન્ટ માટે જાણીતો છે. પરંતુ આ વખતે શોમાં કંઈક એવું બન્યું જેનાથી સોશિયલ મીડિયા પર લોકો ગુસ્સે થયા. રણવીરે શોમાં એક કન્ટેસ્ટન્ટને વાંધાજનક પ્રશ્નો પૂછ્યા હતા. રણવીરે એક સ્પર્ધકને એવો ગંદો સવાલ પૂછી નાખ્યો જેનો અર્થ એવો થતો હતો કે ‘શું તમે તમારાં માતા-પિતા સાથે અંગત પળો માણશો?’ આ અને આ સિવાય પણ શોમાં ભરપૂર ગંદી કમેન્ટ્સ હતી. તેને લીધે ખાસ કરીને યંગસ્ટર્સમાં આ સુપરહિટ શો અત્યારે વિવાદમાં આવ્યો છે. આ શો સામે

હવે મુંબઈ હાઇકોર્ટના એડવોકેટ આશિષ રાય અને પંકજ રાયે મહિલા આયોગને પણ ફરિયાદ મોકલી છે. ઉલ્લેખનીય છે કે ગયા વર્ષે પ્રધાનમંત્રી મોદીએ ભારતના કેટલાક ડિજિટલ ક્રિએટર્સને ‘નેશનલ ક્રિએટર્સ એવોર્ડ’ આપીને સન્માનિત કર્યા હતા. તેમાં રણવીર અલ્લાહાબાદિયાનો પણ સમાવેશ થતો હતો. દરેક માટે વાણી સ્વાતંત્ર્ય છે પણ.... - મુખ્યમંત્રી આ સમગ્ર મામલે મહારાષ્ટ્રના મુખ્યમંત્રીએ દેવેન્દ્ર ફડણવીસની પણ ટિપ્પણી આવી છે. તેમણે કહ્યું, ‘મને આ અંગે માહિતી મળી છે, જોકે મેં તે જોયું નથી. પરંતુ મને ખબર પડી છે કે આ શો અશ્લીલ કોમેડી પર ચલાવવામાં આવી રહ્યો છે, જે બિલકુલ

ખોટું છે. વાણી સ્વાતંત્ર્ય દરેક માટે છે, પરંતુ જ્યારે આપણે કોઈ બીજાની સ્વતંત્રતા પર અતિક્રમણ કરીએ છીએ ત્યારે આપણી સ્વતંત્રતા સમાપ્ત થાય છે. આ યોગ્ય નથી. દરેકની પોતાની મર્યાદા હોય છે, અમે અશ્લીલતા માટે નિયમો પણ નક્કી કર્યા છે. જો કોઈ તેનો ભંગ કરશે તો તેની સામે કાર્યવાહી કરવામાં આવશે.’ એડવોકેટ આશિષ રાયે કહ્યું - આ વીડિયો ઓનલાઈન પોર્ટલ પર અપલોડ કરવામાં આવ્યા હતા, જ્યાં મહિલાઓ વિશે ગંદી વાતો કહેવામાં આવી હતી. એટલું જ નહીં, આ નિવેદનો પછી ત્યાં હાજર લોકો હસતાં પણ જોવા મળ્યાં, જે સ્પષ્ટ કરે છે કે તેમના

ઇરાદા મહિલાઓ પ્રત્યે આદરપૂર્ણ નહોતા. એવું પણ કહેવામાં આવી રહ્યું છે કે આ વીડિયોનો હેતુ ફક્ત લોકપ્રિયતા મેળવવાનો હતો. મહિલાઓ પર અભદ્ર ટિપ્પણીઓ કરીને, આ લોકો ઓનલાઈન પ્લેટફોર્મ દ્વારા પૈસા કમાવવા માગે છે. આ તો સીધો ગુનો છે. સમાજ કે કોઈપણ વર્ગ વિરુદ્ધ ગંદાં નિવેદનો આપવા એ કાયદાકીય રીતે પણ ખોટું છે. ખાસ કરીને જ્યારે આ કન્ટેન્ટ નાના બાળકો સુધી પણ પહોંચી શકે છે, કારણ કે આ વીડિયોઝ કોઈપણ વ્યક્તિ ઓનલાઈન સરળતાથી એક્સેસ કરી શકે છે. આજકાલ સોશિયલ મીડિયા પર ફક્ત મોટા ચહેરાઓ જ આવી હરકતો કરી રહ્યા છે, જેમના

ફોલોઅર્સમાં અમારા અને તમારા ઘરના બાળકો પણ સામેલ છે. આવી સ્થિતિમાં, તેની સીધી અસર લોકો પર પડે છે. આ કારણોસર, આ ફરિયાદ મુંબઈ પોલીસ કમિશનર, રાષ્ટ્રીય મહિલા આયોગ, મહારાષ્ટ્ર મહિલા આયોગ અને બાળ આયોગને મોકલવામાં આવી છે. પહેલા IPCમાં આવા કેસોમાં કડક કલમો હતી, પરંતુ હવે નવા BNS (ભારતીય ન્યાયિક સંહિતા) હેઠળ કાર્યવાહી કરવામાં આવશે. આ ઉપરાંત, ડિજિટલ માધ્યમથી આ બન્યું હોવાથી IT એક્ટ હેઠળ પણ કેસ નોંધી શકાય છે. હવે પોલીસ પર આધાર રાખે છે કે તેઓ તેના પર કયા કલમો લગાવે છે. હાલમાં, જે લોકો સામે

ફરિયાદ દાખલ કરવામાં આવી છે તેમને અમારા દ્વારા કોઈ નોટિસ મોકલવામાં આવી નથી. અમારું કામ ફરિયાદ નોંધાવવાનું હતું, હવે આગળની કાર્યવાહી કરવાનું જવાબદાર અધિકારીઓના હાથમાં છે. રણવીર અલ્લાહાબાદિયાએ માફી માગી વિવાદ વધતાં હવે રણવીર અલ્લાહાબાદિયાને પણ પોતાની ભૂલનું ભાન થયું છે. એણે સોશિયલ મીડિયા પ્લેટફોર્મ ‘X’ (અગાઉનું ‘ટ્વિટર’) પર વીડિયો પોસ્ટ કરીને માફી માગી છે. રણવીરે કહ્યું છે કે, ‘કોમેડી મારો વિષય નથી. શોમાં મેં જે કહ્યું તે તદ્દન હલકી કક્ષાનું હતું, હું મારા નિવેદન બદલ કોઇપણ જાતનું સ્પષ્ટીકરણ આપ્યા વિના સૌની માફી માગું છું. મારાં પોડકાસ્ટના વીડિયો તમામ ઉંમરના

લોકો જુએ છે, અને હું દૃઢપણે માનું છું કે યુટ્યૂબ જેવા પ્લેટફોર્મનો ઉપયોગ આવી સામગ્રી પીરસવા માટે ન જ થવો જોઇએ. હું ‘ઇન્ડિયા હેઝ ગોટ લેટેન્ટ’ના મેકર્સને પણ વિનંતી કરું છું કે તેઓ મારી વાંધાજનક કમેન્ટ્સનો હિસ્સો શોમાંથી દૂર કરી દે.’ ગૌરવ તનેજાએ પણ પોતાનો ગુસ્સો વ્યક્ત કર્યો યુટ્યુબ પર 'ફ્લાઈંગ બિસ્ટ' તરીકે ફેમસ યુટ્યુબર ગૌરવ તનેજાની પ્રતિક્રિયા પણ સામે આવી છે. તેમણે સોશિયલ મીડિયા પ્લેટફોર્મ X પર પોસ્ટ કર્યું છે કે લાગે છે કે સમય રૈના સમગ્ર YouTube ભારત પર પ્રતિબંધ મૂકાવશે. ગૌરવ તનેજા ઉપરાંત, ઘણા અન્ય યૂઝર્સ રણવીરની આ

કોમેન્ટ પર ગુસ્સો વ્યક્ત કર્યો છે. આ શોને પ્રતિ એપિસોડ સરેરાશ 20 મિલિયનથી વધુ વ્યૂઝ મળે છે સમય રૈનાનો આ શો તેની ડાર્ક કોમેડીને કારણે હેડલાઇન્સમાં રહે છે. આ શોને યુટ્યુબ પર પ્રતિ એપિસોડ સરેરાશ 20 મિલિયનથી વધુ વ્યૂઝ મળે છે. સમય અને બલરાજ ઘાઈ સિવાય આ શોના જ્જ દરેક એપિસોડમાં બદલાતા રહે છે. દરેક એપિસોડમાં એક નવા કન્ટેસ્ટન્ટને પર્ફોર્મ કરવાની તક મળે છે. કન્ટેસ્ટન્ટને તેની પ્રતિભા દર્શાવવા માટે 90 સેકન્ડનો સમય આપવામાં આવે છે. આ શો તેની ડાર્ક કોમેડી અને કન્ટેસ્ટન્ટ અને જજની હરકતો માટે વાઈરલ રહે છે.​​​​