ગુજરાતી સુપરસ્ટાર મલ્હાર ઠાકર તથા પૂજા જોશીના ઘરમાં કિલકારી ગુંજશે. મલ્હાર તથા પૂજાએ આજે 23 જૂને સો.મીડિયામાં પેરેન્ટ્સ બનવા અંગે પોસ્ટ શૅર કરી હતી. બંનેએ ગયા વર્ષે 26 નવેમ્બરે અમદાવાદમાં ધામધૂમથી લગ્ન કર્યાં હતાં. સો.મીડિયામાં શું કહ્યું? મલ્હાર તથા પૂજાએ શૅર કરેલી પોસ્ટમાં કહેવામાં આવ્યું છે, 'અમારો પરિવાર થોડો મોટો બની રહ્યો છે. હાલમાં અમે ઘણા જ ખુશ છીએ અને અમને આ જાહેરાત કરતાં ઘણો જ એટલે ઘણો જ આનંદ થઈ રહ્યો છે. અમારી નાનકડી સુંદર દુનિયા હવે ત્રણ લોકોની બની રહી

છે. અમે ઘણા સમયથી આ સપનું જોઈ રહ્યા હતા અને ટૂંક સમયમાં અમારા જીવનનું નવું સપનું સાકાર થશે. નવા આનંદ ને ઊંઘ વગરની રાતો માટે અમે તૈયાર છીએ. બહુ જ બધો પ્રેમ...' સો.મીડિયામાં ચાહકો-સ્ટાર્સે શુભેચ્છા પાઠવી સો.મીડિયામાં જાહેરાત કરતાં જ મલ્હાર-પૂજાને ચાહકો તથા ગુજ્જુ સેલેબ્સે શુભેચ્છા પાઠવી હતી. રાજ અનડકટ, હિતેન તેજવાની, રોનક કામદાર, હેમાંગ દવે, જિનલ બેલાની સહિતની સેલિબ્રિટીએ અભિનંદન આપ્યાં હતાં. કેવી રીતે બંનેની લવસ્ટોરી શરૂ થઈ? પૂજા જોશી મૂળ મુંબઈની છે અને ગુજરાતી ફિલ્મમાં કામ કરે છે. કોરોનાકાળમાં એક્ટ્રેસે મલ્હાર

સાથે વેબસિરીઝ ‘વાત વાતમાં’માં કરી હતી. આ સિરીઝથી બંને એકબીજાના સંપર્કમાં આવ્યાં અને પછી પ્રેમમાં પડ્યાં. ત્યાર બાદ બંનેએ ‘લગ્ન સ્પેશિયલ’ અને ‘વીર ઈશાનું સીમંત’માં સાથે કામ કર્યું. ગયા વર્ષે લગ્ન કર્યાં મલ્હાર ઠાકર અને પૂજા જોશીએ ગયા વર્ષે 26 નવેમ્બરે લગ્ન કર્યાં હતાં. લગ્નનાં ફંક્શન ત્રણ દિવસ ચાલ્યાં હતાં, જેમાં મહેંદી, હલ્દી, સંગીત, લગ્ન તથા રિસેપ્શન યોજવામાં આવ્યાં હતાં. મલ્હાર-પૂજાનાં લગ્ન-રિસેપ્શનમાં ગુજરાતી ફિલ્મ ઇન્ડસ્ટ્રીની અનેક સેલિબ્રિટી આવી હતી. રિસેપ્શનમાં ગુજરાતના ગૃહમંત્રી હર્ષ સંઘવી ખાસ હાજર રહ્યા હતા. મલ્હાર-પૂજાનાં લગ્નની ખાસ તસવીરો....