સાઉદી અરબમાં આજથી હજ યાત્રા શરૂ થશે. આ માટે રવિવાર સુધીમાં 14 લાખ નોંધાયેલા હજયાત્રીઓ મક્કા પહોંચી ગયા છે, જ્યારે લાખો લોકો હજુ આવવાના બાકી છે. આ યાત્રા ઇસ્લામિક કેલેન્ડરનો 12મો મહિનો (2025માં 4-9 જૂન) ઝીલ-હિજ્જાની 8મી અને 12મી તારીખની વચ્ચે થાય છે. હજ એ મુસ્લિમોનું આધ્યાત્મિક અને ફરજિયાત ધાર્મિક કર્તવ્ય છે. શારીરિક, આર્થિક અને માનસિક રીતે સક્ષમ અને સ્વસ્થ દરેક મુસ્લિમ માટે જીવનમાં ઓછામાં ઓછું એક

વાર હજ કરવી ફરજિયાત છે. હજ એ ઇસ્લામના પાંચ મૂળભૂત સ્તંભોમાંથી એક છે. દર વર્ષે વિશ્વભરમાંથી લગભગ 25 લાખ મુસ્લિમો આ પવિત્ર યાત્રામાં ભાગ લે છે. આ વર્ષે ભારતમાંથી લગભગ 1.75 લાખ લોકો મક્કા પહોંચશે. હજ દરમિયાન, મુસ્લિમો કાબા (બૈતુલ્લાહ)ની પરિક્રમા કરે છે અને અલ્લાહને નમાજ અદા કરવામાં સમય વિતાવે છે. હજ એ મુસ્લિમો માટે પાપોથી મુક્તિ મેળવવા, આધ્યાત્મિક શુદ્ધિ અને અલ્લાહની નજીક જવાનો અવસર છે. હજનો

ઇતિહાસ પયગંબર ઇબ્રાહિમથી શરૂ થાય છે હજની શરૂઆત પયગંબર ઇબ્રાહિમના સમયથી થઈ હોવાનું માનવામાં આવે છે. ઇબ્રાહિમ અને તેમના પુત્ર ઇસ્માઇલે અલ્લાહના આદેશથી કાબા બનાવ્યો હોવાનું માનવામાં આવે છે. 629માં પયગંબર મુહમ્મદ સાહેબે પ્રથમ ઇસ્લામિક યાત્રા શરૂ કરી. 632માં તેમણે યાત્રાનું આધુનિક સ્વરૂપ સ્થાપિત કર્યું, જે મુસ્લિમો આજે પણ નિભાવે છે. એક મુસ્લિમ પોતાના જીવનમાં ગમે તેટલી વાર હજ કરી શકે છે. જોકે, ભીડને નિયંત્રિત કરવા માટે,

સાઉદી અરેબિયાના હજ મંત્રાલય અને ઘણા દેશોની સરકારોએ એક નિયમ બનાવ્યો છે કે વ્યક્તિ પાંચ વર્ષમાં ફક્ત એક જ વાર હજ કરી શકે છે. 5 વર્ષનો નિયમ સાઉદી અરેબિયામાં રહેતા લોકો માટે એટલો કડક રીતે લાગુ પડતો નથી, પરંતુ તેમણે પણ હજ કરવા માટે સત્તાવાર મંજુરી લેવી પડે છે. હજ સંબંધિત નવા નિયમો જાણો... સાઉદી સરકારે આ વખતે હજ દરમિયાન મક્કા માટે પ્રવેશ અને વિઝા નિયમો કડક બનાવ્યા

છે. આ વખતે, ફક્ત સત્તાવાર હજ વિઝા અથવા કર્મચારી પરમિટ ધરાવતા લોકોને જ મક્કામાં પ્રવેશવાની મંજૂરી આપવામાં આવશે. પ્રવાસી, વ્યવસાયિક અથવા અન્ય વિઝા ધરાવતા લોકોને હજ સીઝન દરમિયાન મક્કામાં પ્રવેશવાની મંજૂરી આપવામાં આવશે નહીં. 2.7 લાખ લોકોને મક્કામાં પ્રવેશતા અટકાવવામાં આવ્યા હજ શરૂ થાય તે પહેલાં સાઉદી અરેબિયાએ મક્કામાં પ્રવેશવાનો પ્રયાસ કરી રહેલા લગભગ 2.7 લાખ લોકોને અટકાવ્યા હતા. ભીડને નિયંત્રિત કરવા અને યાત્રાળુઓની સુરક્ષા સુનિશ્ચિત કરવા માટે

આ પગલું લેવામાં આવ્યું છે. અધિકારીઓએ જણાવ્યું હતું કે ગયા વર્ષે ગરમીને કારણે થયેલા મૃત્યુ બાદ, મંજુરી વિના હજ કરી રહેલા લોકો પર કડક કાર્યવાહીના ભાગ રૂપે આ કાર્યવાહી કરવામાં આવી હતી. સાઉદી સરકારના જણાવ્યા અનુસાર, ગયા વર્ષે હજ દરમિયાન 51.8 ડિગ્રી તાપમાનની ગરમીમાં 1,301 હજયાત્રીઓના મૃત્યુ થયા હતા, જેમાંથી મોટાભાગના લોકો પરમિટ વગરના હતા. પરવાનગી વિના હજ કરતા લોકો ભીડમાં વધારો કરે છે, જેના કારણે

નાસભાગ અને મૃત્યુનું જોખમ રહેલું છે. પરવાનગી વગર હજ કરનારાઓ માટે સજા... દંડ: હજ પરમિટ વિના પકડાય તો 20,000 રિયાલ (લગભગ 5,000 ડોલર અથવા રૂ. 4.2 લાખ) સુધીનો દંડ. દેશનિકાલ: વિદેશી યાત્રાળુઓને દોષિત ઠેરવ્યા પછી દેશનિકાલ કરી શકાય છે અને 10 વર્ષ સુધી સાઉદી અરેબિયામાં પ્રવેશવા પર પ્રતિબંધ મૂકવામાં આવી શકે છે. અન્ય સજાઓ: નિયમો તોડવા બદલ 23,000 થી વધુ સાઉદી નાગરિકોને દંડ ફટકારવામાં આવ્યો છે, અને 400

હજ સર્વિસ કંપનીઓના લાઇસન્સ રદ કરવામાં આવ્યા છે. મક્કામાં એક પ્રેસ કોન્ફરન્સમાં બોલતા, સાઉદી લેફ્ટનન્ટ જનરલ મોહમ્મદ અલ-ઓમારીએ કહ્યું: યાત્રાળુઓ અમારી નજર હેઠળ છે, અને જે કોઈ નિયમો તોડશે તે અમારી પકડમાં હશે. સાઉદી સરકારે સુરક્ષા માટે અનેક પગલાં લીધા છે ભૂતકાળના અકસ્માતોમાંથી પાઠ લેતા, સાઉદી સરકારે આ વખતે યાત્રાળુઓની સુરક્ષા સુનિશ્ચિત કરવા માટે ઘણા પગલાં લીધાં છે. ડ્રોનનો ઉપયોગ: આ વર્ષે પહેલીવાર, દેખરેખ, ભીડ મેનેજમેન્ટ અને અગ્નિશામક

કામગીરી માટે ડ્રોનનો ઉપયોગ કરવામાં આવશે. આરોગ્ય સુવિધાઓ: 50,000થી વધુ મેડિકલ સેવાઓ, 71 મેડિકલ પોઈન્ટ અને 140 સર્જરીની સુવિધાઓ તૈયાર કરવામાં આવી છે. સ્માર્ટ ટેકનોલોજી: નુસુક અને અરશિદની પ્લેટફોર્મ દ્વારા યાત્રાળુઓ માટે પરિવહન અને રહેવાની વ્યવસ્થા સરળ બનાવવામાં આવી છે. ગરમીથી રક્ષણ: યાત્રાળુઓને છત્રીનો ઉપયોગ કરવાની, પૂરતું પાણી પીવાની અને ભીડવાળી જગ્યાઓથી બચવાની સલાહ આપવામાં આવે છે. છેલ્લા 40 વર્ષમાં હજ દરમિયાન થયેલા 10 મોટી દુર્ઘટનાઓ