આજે લોકોની જીવનશૈલીમાં બદલાવ આવ્યો છે. ભારતના લોકો પશ્ચિમી દેશોનું આધુનિકરણનું અનુકરણ કરવા લાગ્યા છે. આજની પેઢીમાં અમેરિકાની જેમ મિત્રો સાથે મોડી રાત સુધી ફરવાનું, સોશિયલ મીડિયા પર સર્ચિંગ, નાઈટ આઉટ જેવી પ્રવૃતિઓ થવા લાગી છે. અમેરિકાના અનુકરણની લહાયમાં આજની પેઢી બીમારીની લપેટમાં આવવા લાગી છે. યુવાનોમાં હાર્ટએટેકનો ખતરો મંડરાવા લાગ્યો છે તો હોસ્પિટલમાં કેન્સર જેવી ગંભીર બિમારીઓમાં પણ યુવાનો વધ્યા હોવાનું કેટલાક આંકડામાં સામે આવ્યું છે.

પશ્ચિમની સંસ્કૃતિનું અનુકરણ વધ્યું

આવી સ્થિતિમાં કેમ આજના યુવાનોમાં સ્વાસ્થ્ય સમસ્યાનું જોખમ વધવાને લઈને એક સંશોધન કરવામાં આવ્યું હતું. આ સંશોધનમાં જાણવા મળ્યું કે યુવા પેઢીથી લઈને બાળકો અને પુખ્ત વયના તમામ લોકોને પશ્ચિમી ખાદ્ય સંસ્કૃતિ વધુ આકર્ષક કરી રહી છે. અને આ જ કારણે છેલ્લા કેટલાક સમયથી ભારતના બજારમાં પણ અમેરિકાની જેમ અલ્ટ્રા-પ્રોસેસ્ડ ફૂડનું માર્કેટ વધ્યું છે. પરંતુ ભારતના યુવાનો પશ્ચિમી ફૂડ કલ્ચરના ક્રેઝમાં બીમારીનો શિકાર થઈ રહ્યા છે.

અલ્ટ્રા-પ્રોસેસ્ડ ફૂડ બાળકો માટે પોયઝન

આરોગ્ય નિષ્ણાતના જણાવ્યા મુજબ અલ્ટ્રા-પ્રોસેસ્ડ ફૂડ બાળકોના વિકાસ પર અસર કરે છે. કેટલાક ખાસ પ્રકારના પ્રોસેસ્ડ ફૂડ બાળકો માટે ઝેર સમાન સાબિત થઈ શકે છે. ખાસ કરીને જ્યારે બાળકો આ પ્રોસેસ્ડ ફૂડનું નિયમિતપણે સેવન કરતા હોય ત્યારે તે બાળકના શારીરિક તેમજ માનસિક વિકાસને નુકસાન પહોંચાડી શકે છે.

બાળકો માટે "ઝેર સમાન" પ્રોસેસ્ડ ફૂડ:

બાળકો માટે પેકેટવાળા ચિપ્સ અને નમકીન સ્વાસ્થ્ય સમસ્યા સર્જી શકે છે. કારણ કે આ ફૂડ લાંબા સમય સુધી પેક કરવામાં આવ્યા હોય છે. આ ફૂડ લાંબા સમય સુધી ચાલે માટે તેમાં ખાસ કેમિકલનો ઉપયોગ કરાતો હોય છે. 
ટ્રાન્સ ફેટ અને મસાલાવાળા ખોરાક પણ બાળકો માટે નુકસાનકારક બન્યા છે. બર્ગર, પીઝા અને પાસ્તા જેવા જંકફૂડનું નિયમિતપણ સેવન કરવાથી પેટમાં એસિડિટિ અને ચરબીનું પ્રમાણ વધે છે. 
બાળકોમાં ટેટ્રા પેક રસ અને બોટલવાળા કોલ્ડ ડ્રિંક્સનું સેવન વધ્યું છે. જો કે તેમાં કેમીકલ્સ અને કૃત્રિમ રંગનો ઉપયોગ કર્યો હોવાથી સુગર લેવલનું પ્રમાણ વધુ હોય છે જેના કારણે લીવર અને કિડની પર ગંભીર અસર થાય છે. 
અત્યારે ઇન્સ્ટનો જમાનો છે એટલે બાળકોથી લઈને મોટાઓને પણ મેગી, નૂડલ્સ અને પાસ્તાની માગ વધી છે. આ ઇન્સ્ટન્ટ બનતી આ વાનગીને ટેસ્ટી બનાવવા માટે મસાલા પાઉડરનો ઉપયોગ કરાય છે. આ મસાલા પાઉડરમાં MSG વધુ હોય છે. જે મગજ અને હોર્મોન પર અસર કરે છે. મોટાભાગના લોકો સપ્તાહમાં બે થી ત્રણ વખત આવા ઇન્સ્ટન્ટ ફૂડનો ઉપયોગ કરે છે. 
ચોકલેટ, કેન્ડી અને ઠંડા પીણાનું બાળકો વધુ સેવન કરવા લાગ્યા છે. આ તમામ ખાદ્ય પદાર્થમાં અતિશય ખાંડ અને કલરિંગ એજન્ટ્સ હોય છે. બાળકો નાનપણથી જ કોલ્ડ ડ્રીંકસનું સેવન કરતા હોવાના કારણે તેમના દાંત પરના એનિમલને નુકસાન થાય છે તેમજ કેવિટી જેવી સમસ્યા પણ ઉદભવે છે.
લોકો વ્યસ્ત જીવનશૈલીના કારણે હોટલ અને રેસ્ટોરન્ટમાંથી ખોરાક ઓર્ડર કરે છે. અને હોટલ અને રેસ્ટોરન્ટમાં ખોરાકને તાજો રાખવા માટે પ્રિસર્વેટિવનો વધુ ઉપયોગ કરાય છે. અનેક રેસ્ટોરન્ટમાં શાક માટે અને પિઝામાં વપરાતી ગ્રેવીને ફ્રોઝન કરવામાં આવે છે. ફ્રોઝન ફૂડ સ્વાસ્થ્ય માટે વધુ નુકસાન કારક બને છે.

ક્રોનિક બીમારીનો શિકાર થઈ રહ્યા છે બાળકો

ભારતમાં અત્યારે સમય બદલાયો છે પરંતુ પહેલાના સમયમાં લોકો તાજા અને પોષક તત્વોથી ભરપૂર ખોરાકનું સેવન કરતા હતા. આજે પણ અનેક ઘરોમાં વાસી ખોરાકને અલવિદા કહેવામાં આવે છે. આ સાથે આજની પેઢીની દિનચર્યા બદલાઈ છે. રાત્રે મોડે સૂવું અને જંકફૂડ અને ઠંડાપીણાનું સેવન દિનચર્યાનો હિસ્સો બન્યા છે. જ્યારે પહેલાના સમયમાં બાળકો વહેલા ઉઠવા, યોગ અથવા કસરત કરવા, સમયસર ખાવા, સૂવા અને જાગવા જેવા નિયમોનું પાલન કરતા હતા. તેઓ નાનપણથી જ ઘર બહાર રમાવાની શારીરિક પ્રવૃત્તિ કરતા હતા. આજે બાળકો બેઠાડું જીવન જીવવાના કારણે અને બદલાયેલી જીવનશૈલીના કારણે ક્રોનિક બીમારીનો શિકાર થઈ રહ્યા છે.