ઇઝરાયલે 1000 સૈનિકોને નોકરીમાંથી હાંકી કાઢ્યા, ગાઝા યુદ્ધ પર સવાલ ઉઠાવતા તેમણે કહ્યું હતું કે- આ યુદ્ધ હવે રાજકીય ઉદ્દેશ્યો પૂરા કરી રહ્યું છે ઇઝરાયલ ડિફેન્સ ફોર્સ (IDF) એ તેના લગભગ 1,000 રિઝર્વ સૈનિકોને બરતરફ કર્યા છે. ઇઝરાયલના લશ્કરી વડા એયાર ઝમીર અને વાયુસેનાએ રિઝર્વિસ્ટને બરતરફ કરવાનો નિર્ણય લીધો છે. જોકે, આ બરતરફી ક્યારે થશે તે હજુ સુધી જાણી શકાયું નથી. આ સૈનિકોએ

ગાઝામાં ચાલી રહેલા યુદ્ધ સામે અવાજ ઉઠાવ્યો હતો અને બંધકોને મુક્ત કરવા માટે તાત્કાલિક યુદ્ધવિરામની માગ કરી હતી. ઇઝરાયલમાં પહેલીવાર આટલા બધા સૈનિકોને એકસાથે હાંકી કાઢવામાં આવ્યા ઇઝરાયલમાં પહેલીવાર આટલી મોટી સંખ્યામાં સૈનિકોને આવા કારણોસર નોકરીમાંથી કાઢી મૂકવામાં આવ્યા છે. બરતરફ કરાયેલા મોટાભાગના સૈનિકો રિઝર્વ સૈનિકો છે જેઓ ગાઝા અને લેબનનમાં તાજેતરના યુદ્ધમાં સામેલ હતા. ગયા મહિને ઇઝરાયલમાં સેંકડો વાયુસેના રિઝર્વિસ્ટ્સે કેટલાક ઇઝરાયલી

અખબારોમાં સરકારને લખેલો એક પત્ર પ્રકાશિત કર્યો હતો. આમાં તેમણે કહ્યું કે ગાઝામાં ચાલી રહેલ યુદ્ધ હવે રાજકીય હિતોને પૂર્ણ કરી રહ્યું છે. તેનો હવે કોઈ લશ્કરી હેતુ નથી. તેમાં કહેવામાં આવ્યું છે કે ગાઝામાં 18 મહિના સુધી ચાલેલી લડાઈ ન તો બંધકોને બચાવી રહી હતી કે ન તો હમાસને ખતમ કરી રહી હતી. તેના બદલે, આ યુદ્ધમાં સૈનિકો, બંધકો અને નાગરિકો માર્યા

જઈ રહ્યા છે. જો યુદ્ધ ચાલુ રહેશે, તો બંધકો, સૈનિકો અને નિર્દોષ લોકો મૃત્યુ પામશે. આ પત્ર પર સેંકડો નિવૃત્ત અધિકારીઓએ સહી કરી હતી. તે ઘણા મુખ્ય ઇઝરાયલી અખબારોમાં પ્રકાશિત થયું હતું. પત્ર પર સહી કરનારાઓમાં રિઝર્વ નેવિગેટર એલોન ગુર જેવા લોકોનો સમાવેશ થતો હતો, જેમને પહેલાથી જ બરતરફ કરવામાં આવ્યા છે. ઇઝરાયલી સેનાએ કહ્યું - આ શિસ્ત વિરુદ્ધ છે ઇઝરાયલી સેનાએ

આ પત્રને 'શિસ્ત' અને 'લશ્કરી નીતિઓ'ની વિરુદ્ધ ગણાવ્યો છે. IDF પ્રવક્તાએ કહ્યું, "અમારી પ્રાથમિકતા દેશની સુરક્ષા છે. એવા સમયે જ્યારે આપણે અનેક મોરચે લડી રહ્યા છીએ, ત્યારે આવી ક્રિયાઓ લશ્કરી એકતાને નબળી પાડે છે." આ સૈનિકોને નોકરીમાંથી બરતરફ કરવા પર ટીકા શરૂ થઈ ગઈ છે. "આ સૈનિકો સાચા હતા. યુદ્ધ 18 મહિનાથી ચાલી રહ્યું છે, અને 59 બંધકો હજુ પણ ગાઝામાં છે. સરકારે

તેમની વાત સાંભળવી જોઈતી હતી, તેમને કાઢી મૂકવાની જરૂર નહોતી," બંધકોની મુક્તિ માટે તેલ અવીવમાં પ્રદર્શન કરી રહેલા કાર્યકર્તા યોવ લેવીએ જણાવ્યું. કેટલાક સાંસદોએ આ કાર્યવાહીને ટેકો આપ્યો અને તેને લશ્કરી શિસ્તનો પ્રશ્ન ગણાવ્યો. તાજેતરના એક મતદાનમાં, 70% ઇઝરાયલી નાગરિકોએ યુદ્ધવિરામ અને બંધકોની મુક્તિને ટેકો આપ્યો હતો. જોકે, પીએમ નેતન્યાહૂ હમાસનો સંપૂર્ણ નાશ ન થાય ત્યાં સુધી યુદ્ધ ચાલુ રાખવાના પક્ષમાં છે.