રમજાનના પવિત્ર મહિનામાં સિનિયર એક્ટર રઝા મુરાદનો એક વીડિયો વાઈરલ થઈ રહ્યો છે. વીડિયોમાં તેઓ દારૂ પીતા જોવા મળી રહ્યા છે. એક મુસ્લિમ બિરાદર પવિત્ર રમજાન મહિનામાં દારૂ જેવી વસ્તુને હાથ પણ કેવી રીતે લગાડી શકે, તે મુદ્દે સોશિયલ મીડિયા પર લોકો આ અભિનેતા પર માછલાં ધોઈ રહ્યાં છે. વાત વધતાં હવે આ અંગે એક્ટરની પ્રતિક્રિયા સામે આવી છે. તેમણે કહ્યું કે આ વીડિયો થોડા દિવસો પહેલાં થયેલા એક ફિલ્મના શૂટિંગનો છે. રઝા મુરાદની પાર્ટીનો વીડિયો વાઈરલ થયો? વાઈરલ વીડિયોમાં રઝા મુરાદ તેમના નજીકના મિત્ર

અને એક્ટર કિરણકુમાર સાથે દારૂ પીતા જોવા મળે છે. કિરણકુમાર અને રઝા મુરાદે તેમના ઇન્સ્ટાગ્રામ એકાઉન્ટ પરથી એક કોલોબ્રેશન પોસ્ટ શેર કરી. મંગળવારે રઝા મુરાદે પોતાના વાઈરલ વીડિયો પર પોતાનું મૌન તોડ્યું. તેમણે પોસ્ટના કોમેન્ટ સેક્શનમાં સ્પષ્ટતા કરતાં કહ્યું કે આ વીડિયો થોડા દિવસો પહેલાં દિલ્હીમાં થયેલા એક ફિલ્મ શૂટિંગનો છે. આ સીનમાં તે પોતાનો રિયલ જન્મદિવસ ઊજવી રહ્યા નથી. ફિલ્મના સેટ પર તેમના રીલ બર્થ-ડેનું શૂટિંગ ચાલી રહ્યું હતું. રમજાન દરમિયાન એક્ટરે દારૂ પીધો હોવાથી ફેન્સ ગુસ્સે થયા વીડિયો વાઈરલ થયા બાદ રઝા મુરાદને

સોશિયલ મીડિયા પર ખૂબ ટ્રોલ કરવામાં આવી રહ્યા હતા. યુઝર્સ પોસ્ટ પર કોમેન્ટ કરી રહ્યા હતા કે રમજાનના પવિત્ર મહિનામાં દારૂ ન પીવો જોઈએ. એક યુઝરે લખ્યું - તમે ખૂબ જ સમજદાર છો, રમજાન મહિનો ચાલી રહ્યો છે, તમને આ બધું કરતા શરમ આવવી જોઈએ. બીજા એક યુઝરે લખ્યું, માફ કરશો, પણ તમારે આ પવિત્ર મહિનામાં આ બધું ન કરવું જોઈએ. એક્ટરે કોમેન્ટ કરી સ્પષ્ટતા આપી રઝા મુરાદે પોતાની કોમેન્ટમાં લખ્યું, ‘પ્લીઝ, પ્લીઝ, પ્લીઝ એવું ન વિચારો કે આ દારૂ પાર્ટી કે બર્થ-ડે પાર્ટીનો વીડિયો છે.

આ ક્લિપિંગ થોડા દિવસો પહેલાં દિલ્હીના છતરપુરમાં શૂટ થયેલી એક અંડર-પ્રોડક્શન ફિલ્મની છે. જ્યાં મારો જન્મદિવસ ઊજવવામાં આવી રહ્યો છે. આ ફક્ત એક ફિલ્મનો સીન છે બીજું કંઈ નથી. તમે લોકો બિનજરૂરી એવું વિચારી રહ્યા છો કે દારૂ પાર્ટી ચાલી રહી છે. મારો જન્મદિવસ તો 23 નવેમ્બરે આવે છે અને અત્યારે તો માર્ચ મહિનો ચાલે છે. વિચાર્યા વગર, તમે લોકો કહી રહ્યા છો કે- અમે રમજાન દરમિયાન ખુલ્લેઆમ દારૂ પી રહ્યા છીએ, જે બિલકુલ ખોટું છે.’ કિરણકુમારે વીડિયોના કેપ્શનમાં લખ્યું - ‘મિત્ર જેટલો જૂનો,

તેટલી જ મજબૂત મિત્રતા. ક્યારેક મિત્રો સાથે કામ કરતી વખતે રીલ અને રિયલ વચ્ચેનો તફાવત અદૃશ્ય થઈ જાય છે.’ રસપ્રદ વાત છે કે થોડા દિવસ પહેલાં ક્રિકેટર મોહમ્મદ શમી ચાલુ મેચે એનર્જી ડ્રિંક પીતો હોય એવો વીડિયો વાઇરલ થયેલો. ત્યારે પણ લોકોએ વાંધો ઉઠાવેલો કે, ‘ક્રિકેટર હોય તો શું થઇ ગયું, રમજાન મહિનામાં ઉપવાસ કેમ રાખ્યો નથી?’ એ પછી સિનિયર સ્ક્રિપ્ટ રાઇટર અને ગીતકાર જાવેદ અખ્તર મોહમ્મદ શમીની વહારે આવ્યા હતા. તેમણે લખેલું કે, ‘શમી સા’બ, આવા પ્રતિક્રિયાવાદી ધર્માંધ લોકોની વાતોને જરાય ધ્યાને ન

લેશો. એ લોકોને કશો ફરક પડતો નથી કે તમે કેવા સળગતા અંગારા જેવા દુબઈના ગ્રાઉન્ડમાં ક્રિકેટ રમીને પરસેવો પાડી રહ્યા છો. તમે ભારતની મહાન ટીમના મહામૂલા સભ્ય છો અને આખા દેશને ગૌરવ અપાવી રહ્યા છો. તમને અનેકાનેક શુભકામનાઓ.’ 70ના દાયકાથી એક્ટર ઈન્ડસ્ટ્રીમાં કામ કરી રહ્યા છે રઝા મુરાદે 70ના દાયકામાં પોતાની એક્ટિંગ કારકિર્દીની શરૂઆત કરી હતી. તેઓ 'રામ તેરી ગંગા મૈલી', 'જોધા અકબર', 'બાજીરાવ મસ્તાની' અને 'પદ્માવત' જેવી ફિલ્મોમાં જોવા મળ્યા છે. રઝા મુરાદની છેલ્લી ફિલ્મ 'બલ્લી વર્સિસ બિરજુ' હતી જે 2023માં રિલીઝ થઈ હતી.