રશિયાની સેનાએ કહ્યું છે કે તેણે દેશના પશ્ચિમી કુર્સ્ક ક્ષેત્ર પર સંપૂર્ણ નિયંત્રણ પાછું મેળવી લીધું છે. રશિયાના રાષ્ટ્રપતિ વ્લાદિમીર પુતિને કહ્યું કે કુર્સ્ક ક્ષેત્રમાં યુક્રેનના તમામ પ્રયાસો સંપૂર્ણપણે નિષ્ફળ ગયા છે. રશિયાના ટોપ લશ્કરી કમાન્ડર, વાલેરી ગેરાસિમોવે જણાવ્યું હતું કે યુક્રેનિયન સૈનિકોના નિયંત્રણ હેઠળ બાકી રહેલું છેલ્લું ગામ હવે ફરીથી કબજે કરી લેવામાં આવ્યું છે. આ આઠ મહિના પહેલા યુક્રેનના અચાનક હુમલા પછી આ ઘટના બની છે. ગેરાસિમોવે એવો પણ દાવો કર્યો હતો કે કુર્સ્ક ક્ષેત્રમાં 76,000થી વધુ યુક્રેનિયન સૈનિકો માર્યા ગયા છે અથવા

ઘાયલ થયા છે. જોકે, આ દાવાની પુષ્ટિ થઈ શકી નથી. યુક્રેને આ દાવાને નકારી કાઢ્યો છે. યુક્રેન કહે છે કે તેના સૈનિકો હજુ પણ રશિયન સરહદી વિસ્તારમાં કાર્યવાહી કરી રહ્યા છે, અને તેણે મોસ્કોના દાવાઓને પ્રોપેગેન્ડા ગણાવ્યો છે. કુર્સ્કમાં યુક્રેનિયન દળોએ છેલ્લા મહિનાઓમાં રશિયન હુમલાઓનો સામનો કર્યો છેલ્લા કેટલાક મહિનાઓથી, યુક્રેનિયન સૈન્યને કુર્સ્ક ક્ષેત્રમાં ભારે દબાણનો સામનો કરવો પડ્યો છે. અહીં 70 હજાર રશિયન સૈનિકોની હાજરી અને ભારે ડ્રોન હુમલાને કારણે યુક્રેનિયન સેનાને પીછેહઠ કરવી પડી. રશિયા આ વિસ્તાર પાછો મેળવવા માટે એક મોટું

અભિયાન ચલાવી રહ્યું છે. યુએસ સ્થિત થિંક-ટેન્ક ઇન્સ્ટિટ્યૂટ ફોર ધ સ્ટડી ઓફ વોર (ISW)એ 25 એપ્રિલના રોજ અહેવાલ આપ્યો હતો કે રશિયન દળોએ હાલમાં કુર્સ્ક ઓબ્લાસ્ટ (પ્રદેશ)માં આંતરરાષ્ટ્રીય સરહદ નજીક આગળ વધ્યા છે જેથી યુક્રેનિયન સૈનિકોને તેમના છેલ્લા બાકી રહેલા સ્થાનોમાંથી બહાર કાઢવાનો પ્રયાસ કરી શકાય. ISWએ પણ અહેવાલ આપ્યો હતો કે 25 એપ્રિલે રશિયાના ઉત્તરપશ્ચિમ બેલ્ગોરોડ ક્ષેત્રમાં લડાઈ ચાલુ રહી હતી. રશિયાએ સ્વીકાર્યું કે ઉત્તર કોરિયાના સૈનિકોએ યુદ્ધમાં તેને સાથ આપ્યો શનિવારે પુતિન સાથેની વિડીયો કોન્ફરન્સ દરમિયાન, રશિયન કમાન્ડર વીલેરી ગેરાસિમોવે જણાવ્યું હતું કે

કુર્સ્ક ક્ષેત્રનું છેલ્લું ગામ ગોર્નલ યુક્રેનિયન દળોથી મુક્ત થઈ ગયું છે. ગેરાસિમોવે રશિયન વળતા હુમલા દરમિયાન ઉત્તર કોરિયાના સૈનિકોની હિંમતની પણ પ્રશંસા કરી. આ પહેલી વાર છે જ્યારે રશિયાએ સેનામાં ઉત્તર કોરિયાના સૈનિકોની હાજરીનો સ્વીકાર કર્યો છે. જવાબમાં, પુતિને ગેરાસિમોવને કહ્યું કે યુક્રેનના પ્રયાસો સંપૂર્ણપણે નિષ્ફળ ગયા છે. પુતિને દાવો કર્યો હતો કે આનાથી રશિયાને અન્ય મોરચે આગળ વધવાનો માર્ગ મળશે. રશિયન સેનાનું કહેવું છે કે તેના સૈનિકોએ હવે યુક્રેનમાં ઉત્તર-પૂર્વીય સુમીની ઘણી વસાહતો પર નિયંત્રણ મેળવી લીધું છે, જે કુર્સ્ક નજીક સ્થિત છે. યુક્રેને

કહ્યું - કુર્સ્કમાં યુદ્ધ ચાલુ છે તે જ સમયે, યુક્રેનિયન આર્મીના જનરલ સ્ટાફે, ટેલિગ્રામ પર પ્રતિક્રિયા આપતા કહ્યું કે યુદ્ધનું મેદાન મુશ્કેલ રહે છે. પરંતુ તેમણે એ પણ ભાર મૂક્યો કે તેમના સૈનિકો હજુ પણ કુર્સ્કમાં તેમની સ્થિતિ જાળવી રાખે છે અને બેલગોરોડ ક્ષેત્રમાં આક્રમણ ચાલુ રાખી રહ્યા છે. યુક્રેને ગયા ઓગસ્ટમાં અહીં ઘૂસણખોરી શરૂ કરી હતી જેથી બંને દેશો વચ્ચે બફર ઝોન બનાવી શકાય, જેનાથી રશિયાને યુક્રેનના પૂર્વીય મોરચા પર સૈનિકો તહેનાત કરતા રોકી શકાય. ટ્રમ્પે કહ્યું- પુતિન યુદ્ધ રોકવા માંગતા નથી અહીં, યુએસ

રાષ્ટ્રપતિ ડોનાલ્ડ ટ્રમ્પ અને વોલોડીદિમીર ઝેલેન્સકીએ શનિવારે વેટિકનમાં સામસામે બેઠા અને યુદ્ધવિરામ અંગે ચર્ચા કરી. ત્યારબાદ ટ્રમ્પે રશિયન રાષ્ટ્રપતિ વ્લાદિમીર પુતિન પર "યુદ્ધ રોકવા માંગતા ન હોવાનો" આરોપ લગાવ્યો. આ દરમિયાન, વ્હાઇટ હાઉસે પોપ ફ્રાન્સિસના અંતિમ સંસ્કાર પહેલા ટ્રમ્પ અને ઝેલેન્સકી વચ્ચેની મુલાકાતને 'ખૂબ જ ઉપયોગી' ગણાવી. ઝેલેન્સકીએ X પર એમ પણ કહ્યું કે બેઠક સારી રહી અને જો યોગ્ય પરિણામો મળશે તો તે ઐતિહાસિક બની શકે છે. ફેબ્રુઆરીમાં વ્હાઇટ હાઉસમાં ઝેલેન્સકી અને ટ્રમ્પ વચ્ચે ચર્ચા થયા પછી આ બંને નેતાઓ વચ્ચેની પહેલી મુલાકાત હતી.