ભાવનગર શહેરમાં ચૈત્ર માસની શરૂઆતથી જ ગરમીનું પ્રમાણ ક્રમશઃ વધી રહ્યું છે. રવિવારે મહત્તમ તાપમાન 40.4 ડિગ્રી સેલ્સિયસ નોંધાયું હતું. સોમવારે સવારનું લઘુત્તમ તાપમાન 25.2 ડિગ્રી સેલ્સિયસ રહ્યું છે. આકરી ગરમીની અસર શહેરના જનજીવન પર સ્પષ્ટ દેખાઈ રહી છે. બપોરના સમયે રસ્તાઓ પર વાહનચાલકોની સંખ્યા નહીવત જોવા મળે છે.

લોકો ગરમીથી બચવા વિવિધ ઉપાયો અપનાવી રહ્યા છે. વાહનચાલકો ટોપી, રૂમાલ અને ચશ્માનો ઉપયોગ કરી રહ્યા છે, જ્યારે મહિલાઓ દુપટ્ટાથી મોં ઢાંકીને ફરી રહી છે. છેલ્લા એક સપ્તાહના તાપમાનના આંકડા જોઈએ તો - ગુરુવારે મહત્તમ તાપમાન 38.7 ડિગ્રી અને લઘુત્તમ 25 ડિગ્રી રહ્યું હતું. શુક્રવારે મહત્તમ 37 ડિગ્રી અને લઘુત્તમ

23.8 ડિગ્રી નોંધાયું હતું. શનિવારે મહત્તમ તાપમાન વધીને 39.2 ડિગ્રી થયું અને લઘુત્તમ 25.9 ડિગ્રી રહ્યું હતું. હવામાન વિભાગના આંકડા મુજબ, ભેજનું પ્રમાણ 20થી 33 ટકા વચ્ચે રહ્યું છે. પવનની ગતિ 2થી 14 કિલોમીટર પ્રતિ કલાક નોંધાઈ છે. બપોરના સમયે શહેરના રસ્તાઓ પર કરફ્યુ જેવી સ્થિતિ જોવા મળી રહી છે.