મોટાભાગના લોકો દાંતની સફાઈને માત્ર સ્મિત સુધારવા કે શ્વાસની દુર્ગંધ દૂર કરવાના માધ્યમ તરીકે જુએ છે. પરંતુ, જાપાનની 'ટોક્યો મેડિકલ એન્ડ ડેન્ટલ યુનિવર્સિટી' દ્વારા કરવામાં આવેલો એક તાજેતરનો અભ્યાસ ચેતવણી આપે છે કે મૌખિક સ્વાસ્થ્યની અવગણના તમારા હૃદયને ગંભીર નુકસાન પહોંચાડી શકે છે. 'ઇન્ટરનેશનલ જર્નલ ઓફ ઓરલ સાયન્સ'માં પ્રકાશિત આ સંશોધન મુજબ, મોંમાં રહેલા બેક્ટેરિયા હૃદયના હુમલા (Heart Attack) પછી હૃદયને ફરીથી સાજું થવાની પ્રક્રિયામાં અવરોધ પેદા કરે છે.

હૃદયની 'હીલિંગ' પ્રક્રિયા અને અવરોધ

જ્યારે કોઈ વ્યક્તિને હાર્ટ એટેક આવે છે, ત્યારે શરીરના કોષો 'ઓટોફેજી' નામની કુદરતી પ્રક્રિયા દ્વારા નુકસાન પામેલા ભાગોને સાફ કરવાનું અને હૃદયને રિપેર કરવાનું કામ શરૂ કરે છે. જોકે, પેઢાના રોગ માટે જવાબદાર 'પોર્ફિરોમોનાસ ગિંગિવલિસ' નામનો બેક્ટેરિયા આ પ્રક્રિયામાં વિલન સાબિત થાય છે. આ બેક્ટેરિયમ લોહીના પ્રવાહ દ્વારા હૃદય સુધી પહોંચી શકે છે.

ગિંગિપેઇન: એક ખતરનાક પ્રોટીન

સંશોધકોએ શોધી કાઢ્યું કે આ બેક્ટેરિયા 'ગિંગિપેઇન' નામનું એક પ્રોટીન ઉત્પન્ન કરે છે. આ પદાર્થ શરીરની રોગપ્રતિકારક શક્તિને છેતરીને હૃદયના કોષોમાં કચરો જમા કરે છે. પ્રયોગો દરમિયાન જાણવા મળ્યું કે જે કોષો આ ગિંગિપેઇનના સંપર્કમાં આવ્યા, તેમની સાજા થવાની ક્ષમતા નોંધપાત્ર રીતે ઘટી ગઈ હતી. ઉંદરો પર કરવામાં આવેલા પરીક્ષણમાં પણ સાબિત થયું કે જેમના મોંમાં આ બેક્ટેરિયા હતા, તેમને હાર્ટ એટેક પછી હૃદયમાં વધુ નુકસાન થયું હતું અને તેમની રિકવરી અત્યંત ધીમી રહી હતી.

બચાવના ઉપાયો

વૈજ્ઞાનિકો જણાવે છે કે જો પેઢામાં સોજો, લોહી નીકળવું કે પાયોરિયા જેવી સમસ્યા હોય, તો તેને સામાન્ય ગણીને અવગણવી જોઈએ નહીં. ખરાબ મૌખિક સ્વાસ્થ્ય માત્ર દાંત પાડી નાખવા પૂરતું મર્યાદિત નથી, પરંતુ તે હૃદયની સાજા થવાની શક્તિને પણ છીનવી લે છે.

DISCLAIMER: આ માહિતી સંશોધન અભ્યાસો અને નિષ્ણાતોના મંતવ્યો પર આધારિત છે. તબીબી સલાહનો વિકલ્પ ન લો. કોઈપણ નવી પ્રવૃત્તિ અથવા કસરત શરૂ કરતા પહેલા તમારા ડૉક્ટર અથવા સંબંધિત નિષ્ણાતની સલાહ લો.

આ પણ વાંચોઃ Tattoo Tips: ટેટૂ કરાવતા પહેલા સાવધાન! આ ડિઝાઈન કરાવ્યા પછી લોકો સૌથી વધુ પસ્તાય છે