એક તરફ ‘સ્ટ્રીટ ફાઇટર’ની દુનિયા, બીજી તરફ હોલીવૂડનાં મોટાં-મોટાં નામો અને આ બધાની વચ્ચે ભારતનો એક એવો એક્ટર, જેણે પોતાની ઓળખ કોઈ ફિલ્મી ખાનદાન કે સ્ટારડમથી નહીં, પરંતુ પોતાની બોડી, શ્વાસ નિયંત્રણ અને માર્શલ આર્ટ્સથી બનાવી છે. વિદ્યુત જામવાલ હવે 'ધલસિમ' બનીને ગ્લોબલ સ્ક્રીન પર ઉતરી રહ્યા છે. પરંતુ રસપ્રદ વાત એ છે કે, વિદ્યુત આ પાત્રને કોઈ બહુ મોટો પડકાર માનતો જ નથી. તેના માટે ધલસિમનું મળવું કંઈક એવું હતું, જાણે નસીબે દરવાજો ખખડાવ્યો અને તેણે બસ દરવાજો ખોલી દીધો. લાસ વેગાસમાં ગાયત્રી મંત્રથી લઈને જેસન મોમોઆ, 50 સેન્ટ, રોમન રેન્સ અને કોડી રોડ્સ સાથે વિતાવેલા 45 દિવસો સુધી, ધલસિમના ટાલવાળા લુકથી લઈને ટાઇગર શ્રોફ સાથે આવનારી ફિલ્મ સુધી- વિદ્યુતે ન્યુ ગુજરાત સાથેની વાતચીતમાં એવી ઘણી વાતો કહી, જેમાં તેમનો એક્શન સ્ટારવાળો અંદાજ પણ છે અને જીવનને જોવાનો

સાવ અલગ દૃષ્ટિકોણ પણ. પ્રશ્ન: જ્યારે ‘સ્ટ્રીટ ફાઇટર’માં ધલસિમની ઑફર આવી ત્યારે શું લાગ્યું- ‘આ પાત્ર તો મારા માટે જ બન્યું છે’ કે પછી સામે એક મોટો પડકાર દેખાયો? જવાબ: પડકાર તો બિલકુલ લાગ્યો નહીં. ડિરેક્ટરે મને ફોન કર્યો ત્યારે તેમણે મારા વિશે સંપૂર્ણ રિસર્ચ કર્યું હતું. તેમને ખબર હતી કે, હું કોણ છું અને આ પાત્ર સાથે હું શું કરી શકું છું. એ કૉલ જ ખૂબ જ સરસ હતો. મને લાગ્યું કે નસીબ બહુ સારી વસ્તુ છે. તમે બસ શાંત રહો, વસ્તુઓ આપમેળે તમારી પાસે આવતી રહેશે. મારા માટે કદાચ આ જ ફૉર્મ્યુલા કામ કરી ગયો. તેમને દુનિયાના 11 શ્રેષ્ઠ ફાઇટર્સની શોધ હતી અને તેમણે મને શોધી કાઢ્યો. યોગ અને કલરીપયટ્ટુનું જે મિશ્રણ આ પાત્રમાં છે, તે મારા માટે અદ્ભુત હતું. પ્રશ્ન: ધલસિમ અને વિદ્યુતમાં સૌથી મોટો ફરક

શું છે અને સૌથી મોટું જોડાણ શું છે? જવાબ: ફરક એ છે કે ધલસિમ પરિવારવાળો માણસ છે. તેની પત્ની છે, બાળકો છે. પરંતુ અમારા બંનેમાં એક ખૂબી ઘણી મળતી આવે છે- તે બીજાઓ માટે લડે છે, પોતાના માટે નહીં. મારા માટે પણ લડાઈ પાછળ કોઈ હેતુ હોવો જોઈએ. કોઈ કારણ ન હોય તો લડવાની જરૂર જ શું છે? પ્રશ્ન: ધલસિમના પાત્રમાં તમારો યોગ, ધ્યાન, શ્વાસ લેવાની કળા અને નિયંત્રણ પણ જોવા મળે છે. શું તમને લાગે છે કે આજના યુવાનોને પણ આ વસ્તુઓની જરૂર છે? જવાબ: યુથને જે કરવું છે, તે કરવું જોઈએ. તેમણે જેને ફોલો કરવું છે, તે કરે. તેઓ હોશિયાર છે, સમજદાર છે. પ્રશ્ન: પરંતુ આજની જનરેશનની આસપાસ એટલો ઘોંઘાટ છે કે, પોતાનાં પર નિયંત્રણ રાખવું મુશ્કેલ છે. આવી સ્થિતિમાં તેઓ દુનિયામાં ભારતનું નામ કેવી

રીતે રોશન કરશે? જવાબ: કદાચ આ વસ્તુઓ તેમનામાં નહીં હોય, તેથી જ તેઓ દુનિયામાં ભારતનું નામ રોશન કરશે. આપણાથી જૂની પેઢીઓએ આ જ વસ્તુઓ મેળવવાની દોડમાં ઘણો સમય વિતાવી દીધો છે. આજની જનરેશન ખૂબ જ ઉમદા છે. તેમનાં મગજ અલગ છે, તેમની વિચારસરણી અલગ છે. આપણું માત્ર એક જ કામ છે- તેમની વિચારસરણીને રોકશો નહીં. તેમને ઊડવા દો. જો તમારા બાળકો હોય, તો તેમને કહો- ‘તમે જે કરવા માગો છો તે કરો, હું સંભાળી લઈશ.’ બસ એટલું યાદ રાખજો કે કેટલીક વસ્તુઓ મર્યાદામાં રહીને કરવામાં આવે છે. અને તે મર્યાદા આ બાળકો જાણે છે. પ્રશ્ન: તમે યોગ, કલરીપયટ્ટુ, શ્વાસોચ્છ્વાસ અને પોતાને ઓળખવાની વાત કરો છો. ખરેખર યુથને આમાંથી શું શીખવું જોઈએ? જવાબ: અમે આ બધાંને અલગ-અલગ નામ આપી દીધાં છે- શિસ્ત, યોગ વગેરે. હકીકતમાં આ માત્ર પોતાને જાણવાનો પ્રયાસ

છે. તમે યોગ દ્વારા પોતાને જાણો, માર્શલ આર્ટ્સ દ્વારા જાણો, કળા દ્વારા જાણો કે રસોઈ દ્વારા. બસ, પોતાને જાણવાનો પ્રયાસ અટકવો ન જોઈએ. તમે જેટલું પોતાને જાણી જશો, એટલું કોઈને કંઈ સમજાવવાની જરૂર નહીં પડે. યોગ એક સારું માધ્યમ છે, કારણ કે તે તમને મૂળભૂત બાબતો શીખવે છે- આસન, પ્રાણાયામ, પ્રત્યાહાર. કેવી રીતે શ્વાસ લેવો, કેવી રીતે બેસવું, કેવી રીતે ચાલવું. જેને યોગ્ય રીતે ચાલવું અને બેસવું આવડી ગયું, તે યોગ્ય રીતે વિચારવાનું પણ શીખી શકે છે. પ્રશ્ન: લાસ વેગાસમાં ટ્રેલર લોન્ચ દરમિયાન તમે ગાયત્રી મંત્ર, સૂર્ય અને ચંદ્રનો પાઠ કર્યો. ત્યાં હાજર હોલિવૂડના કલાકારો તમને જોતા જ રહી ગયા. તે સમયે તમારા મગજમાં શું ચાલી રહ્યું હતું? જવાબ: હકીકતમાં, મને જ સૌથી પહેલાં માઇક આપવામાં આવ્યો હતો. મને લાગ્યું કે જ્યારે ડર લાગે ત્યારે ગાયત્રી મંત્રનો જાપ કરી

લેવો જોઈએ. ગાયત્રી મંત્ર થઈ ગયો તો લાગ્યું કે હવે સૂર્ય ચાલીસા પણ વાંચી લો અને પછી ચંદ્રનું પણ કરી જ લો! પરંતુ જે રીતે ત્યાં સમગ્ર વાતાવરણ શાંત થઈ ગયું, તે ખૂબ જ સારું હતું. ઘણી વસ્તુઓને ભાષાની જરૂર હોતી નથી. એ માત્ર એક અનુભવ હોય છે. આ મંત્રોમાં એવી શક્તિ છે જે તમને શાંત કરી દે છે. ત્યાં બેઠેલા દરેક વ્યક્તિની અંદર એક શાંતિ આવી ગઈ હતી. ખૂબ જ સરસ લાગણી હતી. પ્રશ્ન: જેસન મોમોઆ, 50 સેન્ટ, રોમન રેન્સ અને કોડી રોડ્સ જેવા મોટા નામો એક જ સેટ પર હોય, ત્યારે શું ત્યાં સ્ટારડમનો માહોલ રહેતો હતો? જવાબ: ફની કે સીરિયસ એવું કંઈ નહોતું. બધા દિગ્ગજો છે. 50 સેન્ટ, રોમન રેન્સ, જેસન મોમોઆ, કોડી રોડ્સ- તેમની સાથે બેસીને સામાન્ય વાતો કરવી ખૂબ જ સહજ હતી.

તમે જીવનમાં શું કર્યું છે એ અલગ વાત છે અને તમે ખરેખર શું છો એ અલગ બાબત છે. તમે જેવા છો એવા જ રહો તો બધું યોગ્ય રહે છે. ક્યારેક મજાક થઈ તો બધા હસ્યા. બધું ખૂબ જ સામાન્ય હતું. પ્રશ્ન: ભારતને લઈને પણ આ સ્ટાર્સ સાથે વાતચીત થઈ? જવાબ: આ લોકો ભારતમાં ઘણી વાર આવી ચૂક્યા છે અને ભારતીયોને ઓળખે છે. રોમન રેન્સને ભારત ખૂબ ગમે છે. તેના મતે WWEનાં સાચા દર્શકો ભારતના જ છે. તેણે અહીંનો જુસ્સો જોયો છે. કોડીને ભારતમાં આવવાની દિલથી ઇચ્છા છે. 50 સેન્ટે ભારતમાં ઘણા શો કર્યા છે. પરંતુ મારા માટે સૌથી મોટી વાત એ હતી કે, હું એવા એક માર્શલ આર્ટિસ્ટનું પ્રતિનિધિત્વ કરી રહ્યો હતો, જેમણે આ પરંપરાગત કળામાં કામ કર્યું છે. તેમની સાથે 45 દિવસ વિતાવ્યા પછી વ્યક્તિનું સાચું સ્વરૂપ દેખાઈ

જાય છે. હું ગર્વથી કહી શકું છું કે દુનિયામાં દરેક ભારતીય માર્શલ આર્ટિસ્ટની કદર થશે. પ્રશ્ન: ધલસિમના ટાલવાળા લુક પર પરિવારજનો અને મિત્રોનો શું પ્રતિસાદ હતો? જવાબ: મને તો આશ્ચર્ય થાય છે કે બધાને ટાલવાળા માણસો કેમ પસંદ આવી રહ્યા છે! હું મારા બધા ટાલવાળા મિત્રોને કહું છું- ‘તમે લોકો વાળ કેમ ઉગાડી રહ્યા છો?’ જે ગેમર્સ છે, તેઓ જાણે છે કે ધલસિમના વાળ ન હોઈ શકે, કારણ કે તે યોગી છે. જે ગેમર્સ નથી, તેમને ફક્ત મનોરંજન દેખાઈ રહ્યું છે. કોઈએ ખૂબ જ સરસ કમેન્ટ કરી- ‘ક્યૂટ લાગી રહ્યા છો.’ મને સમજાયું નહીં કે ટાલવાળો માણસ ક્યૂટ કેવી રીતે લાગી શકે, પરંતુ લોકોએ કહ્યું તો ઠીક છે! પ્રશ્ન: દરેક ફિલ્મ સાથે ચાહકોની અપેક્ષાઓ વધતી જાય છે. શું તમને તેનું દબાણ અનુભવાય છે? જવાબ: કોઈ જવાબદારી નથી. જવાબદારી તમારી

પોતાની હોય છે કે તમે યોગ્ય કામ કરો, ખુશ રહો અને પોતાને વધુ નિખારતા રહો. શૂટિંગ દરમિયાન પણ હું એવું જ વિચારતો હતો કે, હું મારી માર્શલ આર્ટ્સને કારણે અહીં સુધી પહોંચ્યો છું. હવે આ પરીક્ષાનો સમય છે અને મારે મારું શ્રેષ્ઠ આપવું છે. બસ, આ જ જવાબદારી હતી. પ્રશ્ન: ટાઇગર શ્રોફ સાથેની તમારી આગામી ફિલ્મને લઈને ઘણી ઉત્સુકતા છે. બંને સાથે આવશે તો પડદા પર શું થવાનું છે? જવાબ: ટાઇગર અને હું હાલમાં એક ફિલ્મ પર કામ કરી રહ્યા છીએ. તેને જાણ્યા પછી ખબર પડી કે અમારા બંનેમાં જે ક્ષમતા છે, જ્યારે આ ફિલ્મ આવશે ત્યારે ખરેખર કમાલ થશે. આજ સુધી અમને એવો કોઈ ડિરેક્ટર મળ્યો નથી, જે અમને બંનેને અમારી કાબેલિયતથી પણ આગળ લઈ જઈ શકે. તેથી હું આ જોડી લઈને ખૂબ જ ઉત્સાહિત છું.