હિંદુ પંચાંગ અનુસાર, આસો માસના વદ પક્ષની એકાદશીના દિવસે ઈન્દિરા એકાદશીનું વ્રત રાખવામાં આવે છે. પિતૃ પક્ષ દરમિયાન આવતી હોવાથી આ એકાદશીનું વિશેષ ધાર્મિક મહત્વ છે. આ દિવસે ભગવાન વિષ્ણુ અને માતા લક્ષ્મીની પૂજા કરવાની સાથે પિતૃઓનું તર્પણ, શ્રાદ્ધ અને પિંડદાન કરવાનું પણ શુભ માનવામાં આવે છે. ધાર્મિક માન્યતા અનુસાર, ઈન્દિરા એકાદશીના દિવસે પિતૃઓ માટે શ્રાદ્ધ અને તર્પણ કરવાથી તેમને શાંતિ અને સદગતિ પ્રાપ્ત થવાની કામના કરવામાં આવે છે. સાથે જ પરિવારમાં સુખ-સમૃદ્ધિ જળવાઈ રહે તેવી માન્યતા છે.

ઈન્દિરા એકાદશી 2026 ક્યારે છે?

દ્રિક પંચાંગ અનુસાર, આસો માસના વદ પક્ષની એકાદશી તિથિ 6 ઓક્ટોબર 2026ના રોજ રાત્રે 2:07 વાગ્યે શરૂ થશે અને 7 ઓક્ટોબર 2026ના રોજ રાત્રે 12:34 વાગ્યે પૂર્ણ થશે. ઉદયા તિથિના આધારે ઈન્દિરા એકાદશીનું વ્રત 6 ઓક્ટોબર 2026, મંગળવારના દિવસે રાખવામાં આવશે.

ઈન્દિરા એકાદશી 2026ના શુભ મુહૂર્ત

ઈન્દિરા એકાદશીના દિવસે પૂજા માટે કેટલાક શુભ ચોઘડિયા આ પ્રમાણે છે:

લાભ ચોઘડિયા: સવારે 10:40થી બપોરે 12:09 સુધી

શુભ ચોઘડિયા: બપોરે 3:05થી 4:33 સુધી

લાભ ચોઘડિયા: સાંજે 7:33થી રાત્રે 9:05 સુધી

ઈન્દિરા એકાદશી 2026 પારણાનો સમય

દ્રિક પંચાંગ અનુસાર, ઈન્દિરા એકાદશીના વ્રતનું પારણું 7 ઓક્ટોબર 2026ના રોજ સવારે 6:16થી 8:39 વાગ્યા સુધી કરી શકાય છે. પારણું યોગ્ય સમયે કરવું એકાદશી વ્રતની પરંપરામાં મહત્વપૂર્ણ માનવામાં આવે છે.

ઈન્દિરા એકાદશીની પૂજા વિધિ

આ દિવસે વહેલી સવારે ઊઠીને સ્નાન કરી સ્વચ્છ વસ્ત્રો ધારણ કરવા. ત્યારબાદ ભગવાન વિષ્ણુનું સ્મરણ કરીને વ્રતનો સંકલ્પ લેવો. પૂજા દરમિયાન ભગવાન વિષ્ણુને દૂધ, દહીં, ઘી, મધ અને સાકરથી બનેલા પંચામૃતથી અભિષેક કરવો. ત્યારબાદ ફૂલ, માળા, પીળું ચંદન અને અક્ષત અર્પણ કરવા.

ભગવાન વિષ્ણુને તુલસીના પાન સાથે ભોગ ધરાવવો. ઘીનો દીવો અને ધૂપ પ્રગટાવી ભગવાન વિષ્ણુની આરાધના કરવી. ત્યારબાદ વિષ્ણુ ચાલીસા, એકાદશી વ્રત કથા અને આરતી કરવી. દિવસ દરમિયાન ઉપવાસ રાખીને સાંજે પણ ભગવાન વિષ્ણુની પૂજા કરવી. બીજા દિવસે દ્વાદશીના દિવસે યોગ્ય સમયે પારણું કરવું.

ઈન્દિરા એકાદશીએ પિતૃઓનું તર્પણ

ઈન્દિરા એકાદશી પિતૃ પક્ષ દરમિયાન આવતી હોવાથી આ દિવસે પિતૃઓનું સ્મરણ, તર્પણ, શ્રાદ્ધ અને પિંડદાન કરવાનું વિશેષ મહત્વ માનવામાં આવે છે. બપોરના સમયે પિતૃઓનું સ્મરણ કરીને તેમની શાંતિ માટે ધાર્મિક વિધિ કરવામાં આવે છે. કેટલાક લોકો આ દિવસે ગરુડ પુરાણનું વાંચન પણ કરે છે.

ઈન્દિરા એકાદશીનું ધાર્મિક મહત્વ

ધાર્મિક માન્યતાઓ અનુસાર, ઈન્દિરા એકાદશીનું વ્રત કરવાથી ભગવાન વિષ્ણુની કૃપા પ્રાપ્ત થાય છે અને પિતૃઓની શાંતિ તથા સદગતિ માટે પ્રાર્થના કરી શકાય છે. પિતૃ પક્ષમાં આવતી હોવાથી આ એકાદશીને અન્ય એકાદશીઓની તુલનામાં વિશેષ માનવામાં આવે છે. માન્યતા છે કે ભગવાન વિષ્ણુની ઉપાસના અને પિતૃઓનું સ્મરણ કરવાથી પરિવારમાં સુખ-શાંતિ, સમૃદ્ધિ અને ખુશહાલી જળવાઈ રહે છે.

આ પણ વાંચો: Shardiya Navratri 2026: નવરાત્રિમાં દુર્ગા સપ્તશતીનો પાઠ શા માટે થાય છે? જાણો તેનું ધાર્મિક મહત્વ

(Disclaimer: આ સમાચારમાં આપવામાં આવેલી માહિતી ધાર્મિક માન્યતાઓ અને સામાન્ય માહિતી પર આધારિત છે. (sandesh news) સંદેશ ન્યૂઝ આની પુષ્ટિ કરતું નથી.)