લાકડાનું ફર્નિચર ઘરની સુંદરતામાં ચાર ચાંદ લગાવી દે છે, પરંતુ થોડીક જ બેદરકારીને કારણે તેના પર પાણી, ચા કે કોફીના કપ મૂકવાથી ગોળાકાર ડાઘ પડી જાય છે. આ સફેદ કે ઝાંખા નિશાન ફર્નિચરનો આકર્ષક લુક ખરાબ કરે છે. જોકે, આ ડાઘ હંમેશા માટે રહી જશે એવું વિચારવાની જરૂર નથી. સામાન્ય ઘરેલું વસ્તુઓનો ઉપયોગ કરીને તમે ફર્નિચરને નવું જેવું ચમકાવી શકો છો.

તાજા ડાઘ માટે ઈસ્ત્રી પદ્ધતિ 

જો ડાઘ તાજેતરમાં જ પડ્યો હોય, તો હળવી ગરમીથી તેને સરળતાથી દૂર કરી શકાય છે. ઈસ્ત્રીને એકદમ નીચા ટેમ્પરેચર (Low Heat) પર સેટ કરો. ડાઘવાળી જગ્યા પર સ્વચ્છ માઈક્રોફાઈબર કાપડ મૂકો. ઈસ્ત્રીને કપડા પર હળવા હાથે 10 સેકન્ડ માટે દબાવી રાખો. કપડું હટાવીને તપાસો. જરૂર જણાય તો આ પ્રક્રિયા ફરી કાળજીપૂર્વક અજમાવો.

સફેદ સરકો અને પાણીનું સોલ્યુશન

જો ઈસ્ત્રીથી ડાઘ દૂર ન થાય, તો વિનેગરનો ઉપયોગ કરો. સરખા પ્રમાણમાં સફેદ સરકો અને પાણી મિક્સ કરીને સોલ્યુશન બનાવો. માઈક્રોફાઈબર કાપડને આ મિશ્રણમાં બોળો, સારી રીતે નીચોવી લો અને ડાઘ પર મૂકીને ધીમેથી દબાવો. લગભગ એક કલાક પછી કાપડ હટાવીને સપાટી સાફ કરી લો.

હઠીલા ડાઘ માટે બેકિંગ સોડા 

જો ડાઘ વધુ ઘાટો હોય, તો બેકિંગ સોડા ઉત્તમ વિકલ્પ છે. ડાઘવાળી જગ્યા પર થોડો બેકિંગ સોડા છાંટો અને તેના પર સફેદ વિનેગરના થોડાં ટીપાં ઉમેરો. સોફ્ટ બ્રશ અથવા કાપડથી હળવા હાથે ઘસો. વધુ પડતું બળ વાપરવાથી વુડ ફિનિશિંગ ખરાબ થઈ શકે છે. સફાઈ કર્યા પછી ભીના કપડાથી લૂછી લો. છેલ્લે, લાકડાની ચમક પાછી લાવવા માટે માઈક્રોફાઈબર કાપડ પર થોડું ઓલિવ ઓઈલ લઈ ગોળાકાર ગતિમાં લગાવો અને પછી સૂકા કપડાથી સાફ કરી લો.

ઓલિવ ઓઈલ અને મીઠાનું મિશ્રણ

સરખા પ્રમાણમાં ઓલિવ ઓઈલ અને મીઠું ભેગું કરી મિશ્રણ તૈયાર કરો. તેને ડાઘ પર લગાવી માઈક્રોફાઈબર કાપડથી હળવા હાથે ઘસો. થોડી મિનિટો રહેવા દીધા પછી સહેજ ભીના કાપડથી સાફ કરી લો.

ફર્નિચરને પાણીના ડાઘથી બચાવવા માટેની ટિપ્સ

લાકડાની સપાટી પર સીધા ગ્લાસ કે કપ રાખવાને બદલે હંમેશા કોસ્ટર (Coasters) નો ઉપયોગ કરો. ફર્નિચર પર પાણી કે ઢોળાયેલું પ્રવાહી લાંબો સમય ન રહેવા દો, તરત જ સૂકા કપડાથી લૂછી લો. સફાઈ માટે હળવા સાબુવાળા પાણીના ભીના કાપડનો ઉપયોગ કર્યા પછી તરત જ સૂકા માઈક્રોફાઈબર કાપડથી ફર્નિચર કોરું કરી લો.

આ પણ વાંચો : Pineapple Benefits: પાચનથી લઈને રોગપ્રતિકારક શક્તિ સુધી છે અદભુત ગુણોનો ખજાનો છે અનાનસ