આપણા ઘરોમાં પૂજા -પાઠ દરમિયાન અથવા નાળિયેરનું પાણી પીતી વખતે નાળિયેરનો ઉપયોગ થાય છે. ઘણીવાર આપણે તેના રેસાવાળા અને કઠણ છોતરાંને નકામા સમજીને કચરામાં ફેંકી દઈએ છીએ. પરંતુ શું તમે જાણો છો કે નાળિયેરનાં આ છોતરાંમાં ઉપયોગી તત્ત્વો હોય છે અને તેનો અનેક રીતે ઉપયોગ કરી શકાય છે. નાળિયેરનાં છોતરાંમાંથી મળતા કોકોપીટ અને રેસાનો ઉપયોગ કરીને ઘરના છોડને સ્વસ્થ રાખી શકાય છે અને ઘરનાં અનેક કામ સરળ બનાવી શકાય છે. હવે પછી નાળિયેરનો ઉપયોગ કર્યા બાદ તેનાં છોતરાં ફેંકવાની ભૂલ ન કરતા. ચાલો જાણીએ નાળિયેરનાં છોતરાંનો ઉપયોગ કરવાની 5 અસરકારક રીતો.

નાળિયેરનાં છોતરાંના ઉપયોગની 5 શ્રેષ્ઠ રીતો
કુદરતી સ્ક્રબર બનાવો

નાળિયેરનાં કઠણ છોતરાંના રેસાનો ઉપયોગ રસોડાનાં હઠીલા ડાઘવાળાં વાસણો, લોખંડની કડાઈ અથવા સિંક સાફ કરવા માટે કુદરતી સ્ક્રબર તરીકે કરી શકાય છે. તે વાસણો પર ખંજવાળ પાડ્યા વિના સારી સફાઈ કરવામાં મદદરૂપ થઈ શકે છે.

દીવા કે ધૂપબત્તી સળગાવવા માટે ઉત્તમ કુદરતી ઈંધણ

નાળિયેરનાં સૂકાં અને કઠણ છોતરાં ભેગાં કરીને રાખી શકાય છે. શિયાળામાં અથવા પૂજા-પાઠ દરમિયાન અગ્નિ પ્રગટાવવા, હવન કરવા કે સગડીમાં સળગાવવા માટે તેનો કુદરતી ઈંધણ તરીકે ઉપયોગ થઈ શકે છે. આ છોતરાં ધીમે ધીમે સળગતાં હોવાથી લાંબા સમય સુધી અંગારા જાળવી રાખવામાં મદદરૂપ થઈ શકે છે.

બીજના અંકુરણ માટે ઉપયોગ કરો

નાનાં બીજ ઉગાડવા માટે નાળિયેરનાં છોતરાંના રેસાનો ઉપયોગ સીડલિંગ ટ્રે અથવા પોટિંગ મિક્સ તરીકે કરી શકાય છે. તેમાં ભેજ જળવાઈ રહે છે, જેનાથી બીજને અંકુરિત થવામાં મદદ મળે છે.

છોડને સ્વસ્થ રાખવામાં આવશે કામ

નાળિયેરના રેસાને અલગ કરીને બારીક પીસી અથવા ખાંડીને તેનો ઉપયોગ કોકોપીટ તરીકે કરી શકાય છે. તેને કુંડાની માટીમાં ભેળવવાથી માટી હળવી રહે છે અને લાંબા સમય સુધી ભેજ જળવાઈ રહે છે. આથી છોડના વિકાસમાં મદદ મળે છે.

હેંગિંગ બાસ્કેટ માટે આધાર બનાવો

જો તમે ઘરમાં લટકતાં છોડ ઉગાડતા હો, તો કુંડાના તળિયે નાળિયેરનાં જાડાં અને આખાં છોતરાં મૂકી શકો છો. તે માટીને બહાર નીકળતી અટકાવવામાં મદદ કરે છે અને કુંડાનું વજન પણ હળવું રાખી શકે છે.

વધુ સમાચાર વાંચવા ડાઉનલોડ કરો સંદેશ ન્યૂઝ એપ : https://sandesh.com/d