આજના સમયમાં રિફાઇન્ડ લોટ (મેંદો), વધુ ખાંડ અને તળેલા ખોરાકનું સેવન વધવાને કારણે નાની ઉંમરે લીવર સંબંધિત બીમારીઓનું પ્રમાણ વધી રહ્યું છે. ભારતમાં મોટાભાગના લોકો ફેટી લીવર (Fatty Liver)ની સમસ્યાથી પીડાઈ રહ્યા છે, જેનું મુખ્ય કારણ નબળી જીવનશૈલી અને અસંતુલિત આહાર છે. હેલ્થ એક્સપર્ટ્સ ફાઇબર અને જરૂરી પોષક તત્વોથી ભરપૂર આહાર લેવાની સલાહ આપે છે. જોકે, ફેટી લીવરના દર્દીઓમાં બટાકાના સેવનને લઈને ઘણી ગેરસમજો છે. આરોગ્ય નિષ્ણાતે આ બાબતે મહત્વની જાણકારી આપી.

શું બટાકા ફેટી લીવર માટે નુકસાનકારક છે?

ડૉક્ટર્સના જણાવ્યા મુજબ, ફેટી લીવરના દર્દીઓ માટે બટાકાને સંપૂર્ણપણે ઝેર ગણાવવું યોગ્ય નથી. ખરી સમસ્યા બટાકા નથી, પરંતુ તેને કઈ રીતે અને કેટલી માત્રામાં રાંધવામાં આવે છે તે છે. બટાકામાં કાર્બોહાઇડ્રેટ્સ અને સ્ટાર્ચનું પ્રમાણ વધુ હોય છે. જો ફેટી લીવર ધરાવતી વ્યક્તિ દરરોજ વધુ માત્રામાં તળેલા બટાકા, ફ્રેન્ચ ફ્રાઈસ, વેફર્સ કે વધુ તેલ-મસાલાવાળું શાક ખાશે, તો શરીરમાં કેલરી વધશે. આનાથી વજન અને બ્લડ સુગર અનિયંત્રિત થઈ શકે છે, જે ફેટી લીવરની સમસ્યાને વધુ ગંભીર બનાવી શકે છે.

ફેટી લીવર ધરાવતા લોકોએ બટાકા કેવી રીતે ખાવા?

ફેટી લીવરની સમસ્યા હોય તેમણે બટાકા ખાવાનું સાવ બંધ કરવાની જરૂર નથી, પરંતુ તેને ખાવાની રીતમાં ફેરફાર કરવો જરૂરી છે. બટાકાને તળવાને બદલે બાફીને કે હળવા રાંધીને મર્યાદિત માત્રામાં ખાઈ શકાય છે.ખોરાકમાં માત્ર બટાકા પર નિર્ભર રહેવાને બદલે તેની સાથે લીલા શાકભાજી, કઠોળ, સલાડ અને પ્રોટીનયુક્ત આહારનો સમાવેશ કરવો જોઈએ.

આહાર અને જીવનશૈલીમાં આ બાબતોનું રાખો ધ્યાન

ફેટી લીવર પર નિયંત્રણ મેળવવા માટે માત્ર બટાકાને દોષ આપવાને બદલે દૈનિક કેલરી, વજન, ખાંડ અને ચરબીયુક્ત (Fatty) ખોરાક પર નિયંત્રણ રાખવું જરૂરી છે. આ માટે એકંદર આહાર અને દિનચર્યામાં સુધારો કરવો સૌથી વધુ મહત્વનો છે. જો તમને ફેટી લીવરની તકલીફ હોય, તો તમારી શારીરિક સ્થિતિ મુજબ યોગ્ય ડાયેટ પ્લાન માટે ડૉક્ટર અથવા ડાયેટિશિયન (Dietitian)ની સલાહ અવશ્ય લેવી જોઈએ.

આ પણ વાંચો : Vegetables in Fridge : શાકભાજી ઝડપથી બગડી જાય છે? અજમાવો ફ્રિજમાં સ્ટોર કરવાના આ નુસ્ખા

(Disclaimer: આ માહિતી વાચકોને વધારે વિગતો પુરી પાડવા માટે છે અને આ સંદર્ભમાં વધારે જાણકારી મેળવવા માટે આપ તજજ્ઞોનો સંપર્ક સાધી શકશો. )